يوميات معلمات ثانوية

[غدي]

المكان : إحدى حجرات مدرسة ثانوية كبيرة جداً تحتوي على أكثر من 800 طالبة

حجرة متوسطة بها إحدى عشر مكتب صغير يعانق كل مكتب الآخر

إزدحام وضجة طوال اليوم الدراسي أصوات تعلو وتخفوا من حناجر إحدى عشر معلمة منهم معلمات لغة عربية ، ومنهم إقتصاد منزلي رسم وتفصيل

اليوم ../../1424

تدخل أريج الغرفة وهي محملةبحقيبة تكاد تنفجر من الكتب والدفاتر

أريج: السلام عليكم يامعلمات

هدوء … ثم …

عائشة: وعليكم السلام آه معليش ماسمعتك

أريج: ليه حصل ايه عادتك تسمعي دبيب النملة والا أحد حسدك

عائشة: تراني ماني فاضية لهرجك والله اللي فيني مكفيني روقي ومشطي شعرك الأول شكلك من كثر ما سشورتيه عامل احتكاك مع الطرحة ونافش زي الطاووس

أريج أمام المرآة تمشط وتضع باقي مكياجها بسرعة شديدة

أريج: طيب ياستي لي رجعة معاكي لكن صحيح فين البقية وين سميرة وين فريدة .. عادتهم ما يتأخروا بالدوام !!

عائشة: أكيد تحت لاتنسي اليوم عاملين موضوع (عيد الحب وأثره على الطالبات) وبيدوروا على الطالبات اللي بيشاركوا في الاذاعة

أريج: أها يعني أمري لله راح انتظر مع طابوري ساعة كمان تحت الشمس وأنا توي داهنة كريم تفتيح للبشرة

منهم لله وزارة التربية يعني لازم طوابير وإذاعة على الصبح

المهم ذكريني أفك معاكي موضوع نكدك الصباحي بعد حصتي

وتأتي ندى .. كعادتها مبتسمة دوماً

ندى : سلام يابنات .. كيفكم ..

تخلع عبائتها المخصرة وتعبق رائحة عطرها الحجرة

ندى: مالكم كأن على رؤوسكن الطير ايه .. في ايه

عائشة: يعني مافي فايدة فيكِ كم مرة قلنا العباءة المخصرة ممنوعة ،ولا كمان عطر فواح للدرجة هذه

خافي ربك والله تعليقات البنات ماهي عاتقتنا أبدا دامك انتِ كدة عاملتلنا عارضة أزياء

ندى: تيب أعمل ايه هذا طبعي أنا ربي عطاني جسم ممشوق وجمال .. أهمله والتف بعباية مثل الخيمة يعني !!

أريج: أقول أنا نازلة شكل المراقبة ولعت وهي تنتظرني أمام طابوري أكمل كلامي معاكم بعدين

***


تحياتي..

[غدي]

اليوم ../ ../1424


عبير: تدخل بغضب شديد الحجرة وترمي دفتر تحضيرها وكتاب الأدب

الكل يسأل بذهول .. خير مالكِ؟

عبير: يا إلاهي بنات آخر عجب والله لو الواحد عطاهم وجه بيلزقوا لزقة ما تنفك

ياريت لزقتهم تنفع مع اللي بالي بالكم

الجميع …يضحك بصوت عالي

سميرة: ياختي صدقيني دول الرجال ماينفع معاهم أي لزق ولا حتى جبس بيفروا مننا ومن البيت مثل فر السليم من المجذوم

هناء: ياساتر جيبي مثل غير هذا

فريدة : أنا والحمد لله اتفكيت من همهم بلا زواج بلا هم الله لا يعيد أيامهم قال ظل راجل ولا ظل حيطة
الحيطة تنفع اكثر على الأقل بنعلق عليها لوحة جميلة تريح أعصابنا أما هم حيطة حتى البوية ما تثبت فيها

ندى كعادتها سرحااانة وبعالم آخر

حنان : (سرحان عبد البصير) هييييييه وين رحتي لفارس الأحلام اللي واقف بالطابور

والا بتفكري في دادي اللي مجننك كل ليلة بعريس الغفلة المرفوض دائماً

ندى: والله إنك فاضية أنا بأفكر في قصيدة جات على بالي فقط

مش أحسن من كلامكم الممل كل مرة بتتكلموا عن أزواجكم وأنهم كخيال المآتة وألا عن شغالاتكم وعنادهم

عائشة: طبعاً مانتي ماذقتي اللي ذقناه من هَمْ الراجل وغلبة العيال وصداع الشغالة
البركة في دادي ومامي والنت اللي شاغلك

الجميع .. بيضحك

حنان : لحظة لو سمحتوا عبير ما قلتي لنا ايه اللي حصل معاكي وعصَّبك من البنات

سميرة: طيب سمع هسسسسسسسسسسس قولي عبير

عبير: فاكرين ياجماعة ( لمى ) الطالبة اللي كل شوية ترسل لي رسائل وباقات ورود كل ماغبت

ندى : فاكرين ياأبلة خصوصاً أبيات الشعر النكتة اللي كتبتها من قريحتها الرائعة ههههههههه

عبير: المهم اليوم قلت لازم أضع حد للبنت هذه أخذتها على جنب وكلمتها… ( يابنتي أنا مثل أختك الكبيرة ولازم تعرفي إني مجرد معلمة لكِ وأنتِ طالبة من ضمن طالبات كثر)

وانتِ زودتيها برسائلك بالجوال وبطاقاتك وهداياكي وأنا الأسلوب هذا بأرفضه تماماً
رجاءاً إلزمي حدك وستوب ترى لا تتضطريني الجأ لتبليغ أهلك يردعوكِ هذه مش مشاعر إعجاب فقط لا هذه مشاعر بتتجه لمنحى خطير وأنا عكس اللي ببالك تماماً

عائشة: برافوا عليكِ أنا نصحتك من الأول توقفيها عند حدّها قلت لكِ تراها مجنونة والله

سميرة: كملي عبير ولا تقاطعوها أرجوكم

عبير: المهم عارفين ردت وقالت ايه …

أنا يا أبلة لو تركتيني راح انتحر وأنا قد كلامي أرجوكِ لا تطنشيني إنتِ عالمي كله وأنا ما بأجي المدرسة إلا علشان أشوفك تبغيني بعد هذا كله أنساكِ مستحيل أنسى حياتي وعمري

أريج : والله إنها بنت مصيبة "هيمانة الأخت"

عبير : شفتوا الوضع أعمل ايه ياجماعة أكلم أمها وألا أكلم المشرفة الاجتماعية هنا ؟

ندى: رأي تنتظري شوفي راح تنتحر والا لا ولو انتحرت جات منها وفكتك من شرها

عبير: تنظر بذهول لندى‍‍

عائشة : شوفي ارسليها عندي وأنا بكفين أرجع لك عقلها والا راح أخلِّيها تنقل من المدرسة كمان.

أريج: عبير شوفي أنا على حد علمي سمعت أن أمها إنسانة غير متفهمة أبداً يعني لو كلمتيها ممكن تفهم الموضوع بشكل خاطئ

المشرفة أفضل اعرضي عليها القصة وشوفي كيف راح تحل المشكلة

يرن جرس انتهاء الفسحة

وتبدأ أصوات صرير فتح الأدراج وإخراج المناديل وحقائب المكياج الكل يتزين ويعيد ما افتقده أثناء الأكل من روج وعطر

بعدها تفتح أدراج أخرى لاستخراج الكتب وأقلام السبورة

ندى : هو أنا على أي فصل الحصة الرابعة أها تذكرت طيب هو أنا قلت للطالبات يجيبوا أدب والا بلاغة ممممممم مش مهم أعطيهم تعبير وأخلص نفسي

أريج: ياجماعة أنا راح أنام صحوني على جرس الحصة السادسة لا تنسوا وانتم خارجين أقفلوا النور والباب وراكم


تحياتي …

[ناسي زمانه]

السلاااااااااااااااام عليكم والرحمه والبركه

بحكـــــــم ان عندي فالبيت كوووووووووم بنات الله يحفظهـــم ويخلصنا منهـــــم الى ابيات عدلهـــم

لكن بعض الاحيان يحكوا لي قصـــص عن المدرسه تشيب شعر الراس والله .. احنا يالعيال ما نقــدر نسويها طبعا انا احكي هنا عن الشطانه

لكن الادهى والامر والفاجعه الكبرى .. هي مفهوم الاعجاب اللي عندهم فالمدرســه .. استغفر احس ان عقولهم قد حبة الشعير اذا ما كانت اقل __> طبعا هاذي وهي مجتمعه هالعقول :10_1_117:

ما اقووووووووووول الله يهديهم هالبنات ... ويحفظ بناتنا من هالخبال الزايـــد ويستــر علينا وعلى جميع المسلمين

تشكراااااااااااات ,,,,

غدي .. مشاركتك هادفه وحلوووووووووووه ومشوقه بعــد ... بس اللي ودي اعرفه انتي اي وحـــده منهم ؟؟ :15_9_9:

ناسي

[غدي]

أخي .. ناسي زمانه

معاك حق والله البنات اليومين هذه صرنا بنشوف العجب من تصرفاتهن بالمدرسة

اعجاب بمعلمات وبطالبات مثلهن وكأن عالمهم قائم على تبادل الاعجاب والمشاعر أما الدروس والاختبارات فشيء ثانوي بحياتهن

مرورك ومتابعتك أسعدتني

ياترى تفتكر ياناسي أنا مين فيهم

تشكراااااات

[غدي]

اليوم…. ../ ../ 1424

غرفة المعلمات في وقت اجتماعهن …الكل مشغول أما بالتصحيح أو قراءة الكتب … شبه هدوء عام

يرن جوال علية …

علية ترد بفرح شديد ولهفة تكاد تنطق عيناها رقصاً

علية: هلا حبي .. هلا عيوني حمد الله على سلامتك .. كيفك .. وحشتني .. كيف رحلتك انشاء الله ما تكون تعبت وأرهقت

ندى تدق عبير التي تجاورها وتغمز لها اشارة إلى حديث علية

ثواني وجميع من بالغرفة ينظرن نحو علية باهتمام و ابتسامة صفراء على شفاههن

علية: خلاص نام انت الآن وانا لما ارجع بعد ساعتين أصحيك تكون ريحت جسمك شوية

تنهي مكالمتها وينهال عليها سيل من الاستفسارات والتهكمات

سلطانة: علية هو "ماي هارت" شرف حضرته من دبي ؟

فريدة : أكيد مانتي شايفاها اليوم مش على بعضها القلق من أول اليوم باين على تصرفاتها
عائشة: وماله من حقها تكون قلقانة وسعيدة برجعة بعلها والا كمان ممنوع الواحدة تفرح لعودة زوجها ؟

سميرة : عودة الهنا ياختي ماكان فِتر وجلس هنا يعني لازم يفك عن نفسه بدبي هذا إذا راح دبي من أصله ما سافر اللي بالي بالكم

أريج : والله إنك يا علية زوجة طيبة ياريت واحدة مننا تصير زيك ترضى تكون قطة مغمضة و تعتبر زوجها ملاك منزل من السماء


ندى: وتقولوا اتزوجي كمان ما تركتوا للحرمة جنب تتكيء عليه كله علشان دلعت زوجها حبتين !!

فريدة:انتِ بس وافقي وجربي الزواج وبعدين لكل حدثٍ حديث يقطع شرك كل ما أشوف راحة بالك أكره اليوم اللي اتنكبت فيه وقلت يازواج


علية: انتم مضايقين ليه أنا واثقة من زوجي لو فين كان بدبي والا المغرب حتى هو بيموت فيا ومستحيل تملى عينه أي واحدة غيري

ندى : أكيد ماشاء الله جسمك يملى عينه لطول السنة والسنة اللي بعدها كمان

عبير: أكيد سكتك بغزله المعتاد آه بس لو أعرف من أي قاموس بيجيب عبارات الغزل اللي سادد اذنك بيها

يرن جرس الحصة وتبدأ كالعادة الأدراج تصطك ثانياً
تظل في الغرفة ندى وعبير

عبير: تصدقي علية غلبانة الراجل متزوج عليها له أكثر من 4 سنوات وهي ما تدري لا وراتبها باسمه في البنك

ندى: تنظر بذهول

ندى: معقول للدرجة هذه ممكن الراجل يقدر يخفي زواجه الثاني طول المدة هذه ؟ ياه منهم والله إنهم ذئاب بشرية !!

طيب والمسكينة عمرها ما حست بالثانية كفشته مثلاً بيكلمها أو سمعت من ناس بقصة زواجه أو حتى سألته يوم عن راتبها

عبير: تبغي عليه تسأله دي ياستي دايبة فيه على انها أجمل منه لو تشوفيه تستغربي كيف حبته أصلاً

قصير ودبة ولا عينه طويلة كمان .

تضحك ندى : معقول قصير وهي بالطول هذا ماشاء الله والله انهم تحفة لما يمشوا جنب بعض طيب مين اللي بيشيل الثاني فيهم !!!




تحياتي..

[شخمطه]

غـــــــــــــــدي .. هذه إحدى روائعك المميزة .. أسلوب جميل وسرد رائع ..



مثل ما قال ناسي .. مشاكل البنات في الحب والهيام والعشق .. اللهم يا كافي .. انتن أخبر بها منـّـا .. ولكن أيضا ً سبب معرفتي بذلك بعض من قريباتي الصغيرات في الإبتدائية والمتوسطه

إضافة إلى ذلك فالغيبة والنميمة و( الحش ) في بعضهن ما يوقفوا عنه .. بين المدرسات .. مسكينة عليه .. كان الله في عونها



الله يكفينا الشر





على فكرة أنتي أي وحده فيهن ؟؟
=:d=

في انتظارك لإكمال روائعك

لا هنت ِ ... سلمت أناملك ِ ودمت ِ =:)=
شخموط

[**السلطانه**]

غدي ....
رائعه القصص ... والأروع اسلوبك في السرد ...

كملي خلنا نشوف البدع ......

أناأظني عرفت انت مين فيهم ؟؟؟!!!!


تحياتي

[غدي]

أخي العزيز ... شخمطة

مرورك أسعدني وأضفى على يومياتي بعض المرح

واضح إن علية حظها جيد لدى الجنس الخشن دام انها بصف الرجل ظالماً أو مظلوماً

عموماً هي دائماً بتشد أعصابنا تجاه سلبيتها المفرطة أما سلطة الرجل واستبداده

أما بالنسبة ل.... من أنا .... ايه رأيك نتركها لليوميات القادمة


تحياتي....

[غدي]

هلا بالغالية .. السلطانة

جميل أن يومياتي نالت استحسانك وجذبتك إليها

أما البدع فبصراحة شديدة بعضها صعب سردها على الملأ

يعني أفضِّل إظهار ما يمكن إظهاره

أكيد فاهمة وش أقصد

سأكمل يومياتي وأتمنى أن تحوز على استحسان قراء المنتدى


تحياتي...

[غدي]

اليوم / .. / .. / 1424


رن جرس الفسحة وهلت المعلمات تهب كعادتها مع مزيج من الغضب والتأفف واستجداء الطالبات ياأبلة ممكن كلمة

.. يا أبلة لو سمحتي دفتري ناقص أجيبه لكِ بكرة .. يا أبلة ممكن تعيدي لي الإختبار

أريج : تدخل وتقفل باب الغرفة بوجه الطالبات

عبير : ها اليوم على مين القهوة والحلى

عائشة : شوفي الجدول وراكي مكتوب مين ياخوفي يكون على سميرة وفريدة

سميرة : وبعدين يعني قلنا لكم ما نعرف نعمل قهوة ولا حلى نعرف فقط نتذوق كفاية عليكم بصماتي على حلاكم وقهوتكم

علية : أظن اليوم القهوة على ندى وأحلام

ندى : مالكم اطمنوا هذي القهوة وعملت لكم تشيز كيك عسى بس يبان بوجهكم

أحلام : وأنا هذي قهوتي وعملت لكم سد الحنك يمكن تخفوا علينا شوي

أريج : ياساتر عليكم كأن قهوتكم وحلاكم خرجت من عيونكم أقول لا يكون فيكم عرق ح...

سميرة : وبعدين يعني لازم تلقحوا بالكلام مالهم ياختي الحضارم .. عسل وكرماء جداً

مادريتوا بيقولوا علماء التاريخ إن حاتم الطائي يمتد نسبه بحضرموت !!

الجميع .. يضحك

ندى : وأنا أشهد إنك كريمة فاكرة يوم ما استلفت منك لبان وقعدتي أسبوع تسأليني ها كيف لبانتي طعمة

أريج : ههههههههههههههه والله ياندى شكلك اليوم راح تنضربي

هناء : سمعتوا آخر خبر

فريدة : هاتي يا وكالة الأنباء

هناء : فاكرين مديرتنا المصونة لما طلبت وضع عسكري مرور أمام المدرسة علشان ينظم مرور السيارات

ويحد من معاكسات الطالبات وطلاب الثانوية اللي جنبنا

علية : أيوة فاكرين جزاها الله خير سمسمة قلبها على مصلحة البنات

هناء : بالله اسكتي ياحبك للمديرة على ايه ما أدري المهم جابوا لنا عسكري قبل أسبوعين أظن أو أكثر

ندى : ايوة صح أنا لاحظت العسكري حتى الزحمة خفت شوي

هناء: خلوني أكمل دائماً توقفوا الكلمة بحلقي

المهم جاء العسكري وعينكم ما تشوف إلا النور تقولوا مختارين لنا دون جوان مش عسكري

ايه الطول الفارع والرشاقة والوسامة اللي ربنا منحه له

تخيلوا البنات تركوا معاكسة الشباب وحولوا الموجة للعسكري ''الدون جوان '' وهو حضرته ماقصّر نعمة تجي لحده ويرفضها مستحيل !!!

صاروا البنات محاوطين العسكري هذه ترمي له رقم وتلك بكل براءة مصطنعة تسقط غطوتها

وطبعاً نصف الشعر خارج والعيون ناعسة والعطر نفاذ والباقي انتم عارفينه

أريج : يا إلاهي لا عسكري ولا ظابط والله بناتنا يلعبوا بالبيضة والحجر

سميرة : جبتك ياعبد المعين تعيننا لقيتك عايز تنعان

هناء : المهم عارفين مديرتنا جنت واشتكت فوراً , اليوم راسلين لها عسكري عجب بصراحة لازم تشوفوه
اتحدى أي طالبة تقرب منه حتى بالغلط

كرش ممتدة متر ولحية ماشاء الله للصدر وعينه يقظة وما ترمش لأي طالبة

ندى : صدقيني هالمرة راح يجننوه الطلاب مش بناتنا لحد ما يقول حقي برقبتي ويفر من مدرستنا

يرن جرس انتهاء الفسحة وبسرعة شديدة تلتهم بعض المعلمات التشيز كيك وسد الحنك

مع رشفات سريعة من القهوة

بعدها صمت مطبق لا شكراً على الحلى ولا تسلم ايدين إللي عملته .." عادة يقطعها من عادة "


تحياتي .....

[شخمطه]

هلا غـــدي .. لا مانع .. (نتركها لليوميات القادمة)


وما زلنا نتابع


تحية وتقدير
:)

[**السلطانه**]

ههههههه

غدي ...قولي لندى يعطيك العافيه على القهوه والحلى ...كأني أنا اللي ماكلتها ... (بس ماعليك ندى بترسلي لاجيتهم جده)

أما العسكري الحليو اللي حاطينه الله يهديهم بس ... هم ماهم عارفين ان البنات هم اللي صارو يدورون العيال ويعاكسونهم ((( الله يهديهم ويصلحهم))) ....
بعدين هو عسكري جاي لغرض معين وش له بالمعاكسات ( حاميها حراميها يعني ) والله شغله وحاله

بس خلهم جابولهم أبو كرش ولحيه يوريهم شغلهم ..... الله يخليه ويستر عليه هذا الرجال بحق وحقيقي ...

غدي ... كملي ....
بس احكي لي عن وحده سهرت باللليل وراحت متأخره >>>أظنهاااااااااا امممممممممم ندى ؟؟؟!!!!!!!!!




تحياتي