الميت الحي

[رولين]

شروق

بالمعركة برد شلف وجمر يدفيني
والثلج ما ذاب رغم ان الجمر حارس



وفزعة قمر بالظلام اللي بيدّيني
وفنجال ما ذقت زيّه يبري الهاجس



والهَرْج واضح وما فيني مكفّيني
والكل منّا هو السقّاي والغارس



(الميّت الحي) .. اسمي لو قريتيني
الوافي اللي وقف يوم الجفا جالس



أحلم واشوفك ولكن ما تشوفيني
والحلم في غيرك انتي ينزع (الواهس)



خلطت بـ (السامري) (مسحوب) و (هجيني)
اباقنع الضيق من شانك واباستانس



بالمعركه شلف لكن ضعت .. دلّيني
كيف انتصرتي وانا من خلقتي فارس



ثم اسكني وسط قلبي واسكني عيني
وان نام حبك بعيني ... رمشي الحارس